Patioaren erabilera eta genero berdintasuna: duela zenbait urte ekin genion ikastolako patioan

gertatzen zenaren inguruan hausnartzeari eta bertatik ateratako ondorioa izan zen neskek eta

baloiarekin jolastea gustuko ez zuten mutilek espazioaren lekurik txikiena eta bazterreko tokiak

erabiltzen zituztela eta mutil baloi zaleek hartzen zutela espaziorik zentralena eta zabalena. Era

berean, ikasle guztien nahiak, gustuak eta beharrak ez ziren asetzen zegoen patio ereduarekin

eta antolaketarekin, horregatik, ikasleekin hitz egin, beraien iritzia jaso eta hainbat aldaketa egin

genituen (porteriak kendu, material ezberdina eskuratu, jolas garaiak beste era batera arautu,).

Zentzu honetan lanean jarraitzen dugu eta parte hartze prozesuen bidez, irakasleen behaketaren

bidez eta Ikastolako Kanpo Espazioa taldearen bidez gai honen inguruan hausnartzen eta eragiten

ahalegintzen gara, etengabeko prozesu baten bidez. 

Mugikortasuna eta ohitura osasuntsuak:

Udarregi Ikastola herriaren goiko aldean kokatuta dago, bertara iristeko aldapa igo behar da.

Ikasle gehienak oinez joaten dira ikastolara, gutxi batzuk bizikletaz eta gainerakoak kotxez nahiz

autobusean. Egunerokoan garrantzia ematen diogu mugikortasunari eta horregatik, sarritan irteten

dira adin ezberdinetako ikasleak ikastolatik inguruko baso, zelai, auzo eta parkeetara. Ohikoa

da ikustea Haur Hezkuntzako, Lehen Hezkuntzako, nahiz DBH.ko ikasleak beraien irakasleekin

herriko txoko ezberdinetan zehar oinez ibilbideak eginez edo jolaserako eta ariketa fisikoa egiteko

lekuaren bila. Egia esan Usurbilen leku ugari daude ikasleekin joateko egokiak direnak eta ohitura

osasuntsuak hartzeko baliogarriak direnak. Hala ere, ikasle zaharrenek beraien beharrei eta

ezaugarriei egokitutako jolastokiak, bilguneak, txokoak aldarrikatzen dituzte, iaz egindako parte hartze

prozesuan adierazi zuten moduan. 

Natura eta aire libreko ekintzen sustapena: Covid19ak hainbat

kalte ekarri ditu gizartera eta ikastetxeetara, baina era berean, positiboki har ditzakegun aldaketak ere

ekarri ditu. Izan ere, gaixotasuna kutsatzeko arriskua asko murrizten da aire librean egonez gero eta

horregatik, ikastolako irakasleek hainbat saio ematen dituzte kanpoan. Aurreko ikasturtean Ikastolako

ikasle, irakasle eta gurasoen artean udal brigadarekin elkarlanean hainbat espazio egokitu genituen

klaseak aire librean eman ahal izateko eta oso esperientzia baliotsua izan zen. Era berean, ikasle

zaharrenek ezin dituzte barruko espazioak erabili jolas garaietan eta horregatik, garrantzitsua da

Ikastola inguruan atsedena hartzeko nahiz jolasteko leku ezberdinak izatea. Aurreko ikasturtean

DBH-ko ikasleentzat lasai egoteko lekuak prestatu genituen, aurten, gure nahia jolaserako eta

mugimendurako espazioak egokitzea da.